Лъэпкъ зэхахьэр…
Аужырэ илъэсищым Iофтхьабзэу Кощхьэблэ районым и «Адыгэ хасэ» зэшIуихыгъэхэр, ыпэкIэ уплъэмэ ыгъэцэкIэн фэе Iофыгъоу къыпыщылъхэр, хэсашъхьэм хэтыщтхэмрэ хасэм къэкIощт илъэсищым ипэщэщтымрэ - мыхэм ыкIи фэшъхьаф упчIэхэм зыщатегущыIэгъэхэ зэхахьэ непэ щыкIуагъ искуствэхэмкIэ кIэлэцIыкIу еджапIэу къуаджэу Кощхьаблэ дэтым. ЗэIукIэу, районым и «Адыгэ хасэ» итхьаматэу НэпшIэкъуй Амин зэрищагъэм, хэлэжьагъэх Кощхьэблэ районым ипащэу Хьамырзэ Заур, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэмкIэ ыкIи къэбар жъугъэхэм иамалхэмкIэ и Комитет итхьаматэу Шхьэлэхъо Аскэр, «Адыгэ Хэку хасэм» итхьаматэу ЛIымыщыкъо Рэмэзан, динлэжьхэр, шIэныгъэлэжьхэр, районым щыпсэурэ нахьыжъхэмрэ къэбарлъыгъэIэс амалхэм яIофышIэхэмрэ.
Апэрэ упчIэу зэхахьэм къыщаIагъэтыгъэр – блэкIыгъэ илъэсищым къыкIоцI Iофыгъоу «Адыгэ хасэм» зэшIуихыгъэхэр ары. Ащ къатегущыIагъ НэпшIэкъуй Амин. УпчIэ зэшIохыгъахэхэу «Хасэм» итхьаматэ зышъхьа къырихыгъэхэм япчъагъэ цIыкIоп: кIэлэцIыкIуIыгъыпIэхэм ачIэс сабыйхэм япIуныгъэ-гъэсэныгъэ фэгъэзэгъэ Iофтхьабзэхэм ащегъэжьагъэу, районым ыкIи республикэм щекIокIырэ мэфэкI зэхахьэхэм анэсыжьэу «Хасэм» хэтхэр зыдэлэжьагъэхэр бэ. Ахэмэ ащыщых лъэпкъым ыгъэлъэпIэрэ мафэхэм яхэгъэунэфыкIын, еджапIэхэм ащекIокIыгъэ зэдэгущыIэгъу зэфэшъхьафхэр, нэжъ-Iужъэу щысэтехыпIэ пстэуми афэхъухэрэр, къызщыхагъэщырэ зэIукIэгъухэр, зэнэкъокъу зэфэшъхьафхэр, районым икъуаджэхэм ягъэдэхэн. Хабзэ зэрэхъугъэу, адыгабзэм икъызэтегъэнэнкIэ лъэбэкъоу «Хасэм» ыдзыгъэхэм шъхьафэу атегущыIагъэх.
- УпчIэу «Хасэм»зэшIуихыгъэр бэ, ау шIэгъэн фаер джыри макIэп! – къыкIигъэтхъыгъ Амин.- ГущыIэм пае, «Лабэ - зэкъошныгъэм ипсыхъу» зыфиIорэ Iофтхьабзэу тирайон имызакъоу Краснодар шъолъырым ирайонхэри зыхэдгъэлэжьэщтым изэшIохын ыуж тит. Iэнэ хъураехэу, гъэсэпэтхыдэхэр зыщыIухэрэм, япчъагъи хэгъэхъогъэн фаеу тэлъытэ. АщкIэ IэпыIэгъу къытфэхъу тирайон ипащи, тиреспубликэ и ЛIышъхьэу КъумпIыл Мурати. АщкIэ ахэми тхьашъуегъэпсэу ятэIо.
Кощхьэблэ районым и Адыгэ хасэ иIофшIакIэ зэригъэразэхэрэр, ыкIи хабзэри цIыфхэри зэкъотхэу фежьэхэмэ лъэпкъым ишIуагъэ езыгъэкIыщт Iофыгъуабэ зэрэзэшIокIышъущтым тегущыIагъэх Мыекъуапэ къикIыгъэ хьакIэхэри Кощхьэблэ районым ипащи.
КъыкIэгъэтхъыгъэн фае, цIыфэу зэхахьэм къеблэгъагъэхэми ащ зэрадырагъэштагъэм. Ащ блэкIэу къэтIон: лъэпкъым зишIуагъэ екIын зылъэкIыщт Iофыгъохэми шъхьаихыгъэу тинахьыжъхэр къытегущыIагъэх. Ахэмэ ащыщых районым «Адыгэ чылэжъые» дэшIыхьэгъэныр, IэкIыб къэралыгъоу адыгэхэр зыщыпсэухэрэм еджакIо тэ тикIалэхэр гъэкIогъэнхэр ыкIи нэмыкIхэр. А зэпстэумкIи республикэм игупчэ къикIыгъэхэм къыддырагъэштагъ ыкIи а Iофыгъохэм ауж зэрихьащтхэмкIэ псэури къагъэгугъагъ.
Хэсашъхьэм хэтыщтхэмрэ ыкIи къихьащт илъэсым «Адыгэ Хэку хасэм» изэхахьэ хэлэжьэщт лIыкIохэмрэ зыхадзыхэ нэуж тирайон и Адыгэ хасэ ипащи джыри зэ хадзыжьыгъ. ЗэIукIэм хэлэжьэгъэ пстэуми зэдашти, а IэнатIэр НэпшIэкъуй Амин къыфагъэшъошэжьыгъ. Ар зэхахьэм иаужырэ упчIагъ.
